У артыкуле аўстрыйскага выдання InfoEuropa распавялі пра Legalize Belarus
InfoEuropa — аўстрыйскае выданне, якое кожны год публікуе выпускі пра культурныя асаблівасці краін Цэнтральнай Еўропы. У гэты раз яны абралі тэму псіхаактыўных рэчываў, і ініцыятыва Legalize Belarus стала героем аднаго з артыкулаў. Гэта выдатная навіна для ўсіх, хто падзяляе нашыя каштоўнасці.
У артыкуле паведамляецца гісторыя, як у пачатку 2010-х гадоў у Беларусі пачалі распаўсюджвацца так званыя «легальныя ПАР» — сінтэтычныя аналагі, якія імітавалі дзеянне забароненых псіхаактыўных рэчываў. У адказ на гэта Лукашэнка стварыў працоўныя лагеры для спажыўцоў, пра што з гонарам паведаміў у тэлевізійным выступе і дадаў, што зняволеныя «будуць маліцца аб смерці».
InfoEuropa распавяла чытачам, што ў 2020 годзе больш за 12000 чалавек у нашай краіне былі прыгавораны да турэмнага зняволення за захоўванне ПАР, у большасці выпадкаў гэта былі нязначныя колькасці. Выданне таксама паведамляе пра рух «Маці 328», які аб’ядноўвае родных і сяброў тых, хто асуджаны па артыкуле 328 Крымінальнага кодэкса РБ, і піша пра іх дзяцей і блізкіх, якія атрымалі неадпаведныя сваім дзеянням пакарання. Напрыклад, некаторыя былі пазбаўленыя волі на 9 гадоў з-за таго, што ў іх знайшлі канабіс, хаця колькасць яго магла быць зусім малой. Нават непаўналетніх адпраўлялі ў калонію на 8 гадоў, дарослыя ж маглі атрымаць і больш за 10. Таксама нярэдка назіраюцца абсурдныя выпадкі, калі двое вырашылі пакурыць канабіс, іх затрымліваюць, і аднаго судзяць за захоўванне, а іншага за распаўсюджванне, хоць гэты чалавек абсалютна недатычны да продажу псіхаактыўных рэчываў, проста сябар узяў самакрутку з яго рук.
Выданне падкрэслівае, што Legalize Belarus імкнецца спыніць такія жорсткія і неабгрунтаваныя пакаранні і абараніць правы чалавека, бо насамрэч справядліва падвяргаць крымінальнаму пераследу толькі дылераў ПАР.
У артыкуле прыводзяцца словы Пятра Маркелава: «Аўтарытарны рэжым у краіне толькі пагаршае сітуацыю з ужываннем псіхаактыўных рэчываў і садзейнічае росквіту чорнага рынку. Разнастайныя абмежаванні, палітычная сітуацыя і нізкія заробкі маральна ціснуць на людзей, таму моладзь шукае спосабы ўцячы ад рэальнасці. Многім даводзіцца з’язджаць з краіны, але апынуўшыся на новым месцы без родных і сяброў, людзі таксама адчуваюць псіхалагічныя праблемы, часта знаходзячы часовы выхад з іх у псіхаактыўных рэчывах». Сам Пётр неаднаразова падвяргаўся рэпрэсіям з боку дзяржавы і быў вымушаны пакінуць Беларусь па палітычных матывах.
Мы спадзяемся, што гэты артыкул прыцягне дадатковую ўвагу да дзейнасці Legalize Belarus і праблем, якія тычацца наркапалітыкі ў нашай краіне, што дапаможа нам у развіцці і дасягненні мэт.
Можно, если осторожно
Вступай в наш клуб за гуманную наркополитику. Твои данные не будут переданы третьим лицам.