Актывісты Legalize Belarus правялі акцыю салідарнасьці ў глухім лесе

Увечары 14 сакавіка актывісты кампаніі Legalize Belarus выйшлі ў лес, каб прадэманстраваць плякаты з «экстрэмісцкім» зьместам у падтрымку тых, хто падвяргаецца адміністратыўнаму перасьледу па артыкуле 17.11 КаАП («Распаўсюд, выраб, захоўваньне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасьці ці прапагандуючай такую дзейнасьць»).

Актывісты Legalize Belarus правялі акцыю салідарнасьці ў глухім лесе
Legalize Belarus
15 марта 2019
Пресс-служба

У прыватнасьці, на плякатах можна пабачыць адсылкі да відэафайлу «Без названия», графічным файлам «Vr3pVg67J8c» і «mPQGJNVPBbw», тэкстам «А.С.А.В» і «CLASS WAR», а таксама да выявы памерам 594×840 мм, якая ўтрымлівае копію фотаздымку, на якім на пярэднім пляне нахілены чырвоны вазок з навозам і плякатам, працятым віламі. Усе гэтыя матэрыялы прызнаныя экстрэміцскімі і зьмешчаныя ў Рэспубліканскім сьпісе экстрэмісцкіх матэрыялаў.

За апошнія паўгады Вячаслаў Касінераў атрымаў 2 штрафы агулам на 95 базавых велічыняў за тое, што зьмясьціў на ўласнай старонцы ў Facebook свой фотаздымак ў шапцы з надпісам «CLASS WAR». Марына Касінерава атрымала штрафы агульнай сумай у 70 базавых велічыняў за рэпосты гэтых здымкаў.

У пачатку сакавіка Мікола Дзядок атрымаў штраф у 50 базавых велічыняў за тое, што зьмясьціў на сваёй старонцы фота налепкі, на якой быў надпіс «A.C.A.B.». Бліжэйшым часам у Гомлі і Рагачове пройдуць суды за рэпосты артыкулаў «Что делать, когда вас загоняют в БРСМ. Советы анархистов» і «Спецназовец из Слуцка до смерти забил двухлетнюю дочь».

«Свабода слова — фундаментальнае, і, магчыма, галоўнае нашае права, ад наяўнасьці якога залежыць магчымасьць рэалізацыі іншых грамадзянскіх правоў і свабодаў. Працэсы па артыкуле 17.11 — гэта безпадстаўны гвалт дзяржавы супраць асобы. Падобнае недапушчальна ў цывілізаваным грамадзтве і мы павінны быць салідарнымі з кожным чалавекам, які падвяргаецца такім палітычным рэпрэсыям», — кажа Пётр Маркелаў.

Да гэтага у падтрымку свабоды слова і асуджаных па артыкуле 17.11 КаАП актывісты далучыліся да флэшмобу Міколы Дзядка і выклалі у сваіх сацыяльных сетках фотаздымкі, зробленыя насупраць уваходу ў менскі бізнэс-цэнтар «Красавік».

Нагадаем, што вэб-сайт асьветніцка-адвакацыйнай грамадзкай кампаніі Legalize Belarus быў заблякаваны ў траўні 2018 году нібыта за «прапаганду спажываньня марыхуаны». 21 сакавіка 2019 ў Менскім гарадзкім судзе (вул. Дуніна-Марцінкевіча, 1/3) адбудзецца разгляд апэляцыйнай скаргі на дзеяньні Міністэрства інфармацыі. Пачатак а 11:00.

Creative Commons Licence

Если не указано иное, содержимое этой страницы лицензировано в соответствии с международной лицензией Creative Commons Attribution 4.0.